Sallën e kishin bërë gati. E këtu do t’i priste zyrtarët e lartë qeveritar, opozitarët dhe pjesëtarët e shoqërisë civile.
Ambasadori Amerikan në Kosovë, ashtu siç kishte paralajmëruar diskutoi me palët e ftuara për çështjen e Asociacionit të Komunave me shumicë serbe.
Me ato se çfarë u diskutua në takimin me dyer të mbyllura ai iu shpreh mirënjohës, dhe në të njëjtën kohë kërkoi zbatimin e të gjitha marrëveshjeve që janë arritur përmes dialogut.
Këto zhvillime për tëvë1 i ka komentuar profesori nga Oxford Univeristy, Richard Caplan.
Ky, thotë se ka rreziqe ne formimin e asociacionit por ato mund te menaxhohen nga Qeveria e Kosovës.
“Kosova u pajtua për themelimin e Asociacionit të Komunave Serbe me nënshkrimin e saj të Marrëveshjes së Brukselit të vitit 2013. SHBA-ja dhe BE-ja i kanë kërkuar Kosovës vazhdimisht, dhe shumë në kohët e fundit, që të respektojë zotimin. Kundërshtimi i vazhdueshëm i Kurtit ndaj Asociacionit ia mundëson Beogradit të thotë se Kosovës nuk mund t’i besohet në negociata. Ndërsa mund të them se ka disa rreziqe në krijimin e Asociacionit, por ato janë rreziqe të menaxhueshme”, tha Caplan.
Ndërsa Miodrag Miliçeviq nga Shoqëria Civile, ka thënë se diskutimet mes palëve ishin shumë konstruktive.
“Normalisht që ka mendime të ndryshme sa i përket formimit të Asociacionit të Komunave me shumicë serbe. Megjithatë konsideroj që duhet të thellohemi më shumë në bisedime për këtë çështje, prandaj vlerësoj se ky takim ishte i mirëseardhur. Në këtë takim nuk u përmend një afat se kur duhet të formohet asociacioni”, tha Miliçeviq.
Nga Departamenti Amerikan i Shtetit kanë garantuar se Asociacioni nuk e cenon Kushtetutën e Kosovës.
Kronika e gazetarit Shpat Blakçori.
