Ish-diplomati, Blerim Canaj e ka komentuar mos takimin në mes të kryeministrit të Kosovës, Albin Kurti dhe atij të Shqipërisë, Edi Rama, gjatë qëndrimit të këtij të fundit të hënën në Kosovë.
Canaj duke e quajtur si të dhimbshme ka vlerësuar se raportet e e ftohta personale të kryeministrave po reflektohen në ato institucionale.
Ai ka thënë se për hir të publikut është dashur të gjenden të paktën 15 minuta kohë për një takim të përbashkët.
“Pavarësisht nga agjenda, pavarësisht si do të duhej të ishte agjenda e njërit apo tjetrit nja 15 minuta për hir të publikut do të mund të siguroheshin, kudo qofshin ata. Nuk ka ndodhë më parë kjo që po e shohim tani. Deri këtë herë gjithmonë kanë pasur kryeministrat dhe shefat e shteteve kohë që të takohen. Tani si duket raportet personale po reflektohen edhe në drejtimin e shtetit. Raportet me Ramën nuk janë vetëm personale, por ndërinstitucionale e shtetërore. Raportet e ftohta personale të kryeministrave po reflektohen në ato institucionale dhe kjo është e dhimbshme “, është shprehur ai në emisionin“ Ditari“ në Tëvë 1.
Theksojmë se Rama është pritur nga presidentja e Kosovës, Vjosa Osmani, kryetari i Prishtinës, Përparim Rama ku edhe i është ndarë çmimi “Çelësi i Qytetit. Gjithashtu, kryeministri Rama ka marrë pjesë në konferencën ndërkombëtare “Rugova dhe Perëndimi”, në 25-vjetorin e çlirimit të Kosovës, e organizuar nga Lidhja Demokratike e Kosovës dhe Fondacioni “Ibrahim Rugova”.
Ndërkaq, Qeveria në një përgjigje për Tëvë1, thotë se në bazë të agjendës së deritanishme, Rama po i takon ata me të cilët konsideron që ka nevojë t`i rregullojë raportet. /tëvë1.info/