Sekretari i Jashtëm i Britanisë së Madhe, David Cameron, gjatë ditës së sotme është takuar me presidenten e Kosovës, Vjosa Osmani dhe me ministren e Jashtme, Donika Gërvalla.
Cameron ka vizituar edhe ushtarët britanikë të KFOR-it në Kosovë, ku me këtë rast është deklaruar edhe rreth sulmit terrorist që ka ndodhur më 24 shtator në Banjskë të Zveçanit.
Ai ka thënë se Britania e Madhe ndihmon Kosovën me të drejtë në përpjekjet e saj për stabilitet, siguri e prosperitet.
“Ajo që ka ndodhur në shtator mendoj se ishte ekstremisht shqetësuese dhe ne duhet të bëjmë gjithçka që mundemi që ta parandalojmë dhe ta luftojmë nëse ndodh sërish. Kosova është shtet i pavarur, sovran që do stabilitet, siguri dhe prosperitet. Britania po ndihmon në të gjitha këto dhe ajo që ne po bëjmë është e drejtë”, ka thënë ai në një intervistë për Reuters.
“Stabiliteti në Ballkan, siguria në Ballkan, ndalimi i atyre që duan të shkaktojnë trazira dhe probleme, janë interesa direkte kombëtare të Britanisë së Madhe”.
Ai është shprehur se Kosova si shtet i pavarur meriton përkrahjen drejt sigurisë dhe suksesit.
Ndërkohë, gjatë intervistës, Cameron ka folur për sulmet ndaj anijeve të mallrave në korsitë e anijeve të Detit të Kuq, ku ka deklaruar se ato duhet të ndalen, përndryshe do të ndërmerren veprime ndërkombëtare.
Ndërkaq, sekretari i Jashtëm i Britanisë së Madhe, David Cameron, mbrëmë është mirëpritur nga kryeministri i Kosovës, Albin Kurti.
Në atë takim, Kurti ka uruar Cameron për detyrën e re, dhe shprehu falënderim për mbështetjen ndaj Kosovës në kohën kur ishte kryeministër i Britanisë së Madhe./teve1.info/
