Avokati Asdren Bytyqi ka komentuar protestën e mbajtur një ditë para miratimit të ligjit në lexim të dytë, si dhe zhvillimet politike që çuan drejt votimit të Justina Shiroka-Pulës për presidente të re të Kosovës.
Duke folur në emisionin “Këndi i debatit” në Tëvë1, Bytyqi deklaroi se protestuesit kishin qenë të armatosur dhe se, sipas tij, institucionet e sigurisë dhe kryeministri Albin Kurti ishin në dijeni të kësaj situate.
Ai vlerësoi se protestuesit ishin të gatshëm të sakrifikoheshin për bashkëluftëtarët e tyre, duke theksuar se kjo duhej të merrej parasysh në vlerësimin e situatës.
“Protestuesit kanë qenë të armatosur. Kam pasur informacion edhe se institucionet e sigurisë kanë qenë të informuara, e ka ditur edhe kryeministri”, deklaroi Bytyqi.
Sipas tij, Kurti ishte i vetëdijshëm për rrezikun e përshkallëzimit të situatës dhe mundësinë e hyrjes së vendit në një krizë politike e të sigurisë.
“Unë mendoj se kryeministri iu ka frikësuar këtyre personave dhe e ka ditur që ata nuk zbrapsen, dhe Kosova mund të hyjë në tensione e në një krizë që nuk mund të menaxhohet ashtu siç dëshiron Albin Kurti”, u shpreh avokati.
Bytyqi foli edhe për procesin politik që çoi drejt zgjedhjes së Justina Shiroka-Pulës si presidente e re e Kosovës, duke kritikuar mënyrën se si, sipas tij, Partia Demokratike e Kosovës (PDK) e kishte zhvilluar këtë proces.
Ai pretendoi se PDK-ja kishte vepruar me hile, duke vlerësuar se propozimi i emrave për presidente ishte bërë në një mënyrë që, sipas tij, synonte ta dobësonte politikisht Kurtin dhe ta pengonte miratimin e ligjit.
“Dhe e dyta, mendoj që PDK-ja ka bërë hile, sepse Kurti e ka menduar që t’i nënshtrojë, ose siç duan të mendojnë ata, mirëpo këta kanë bërë hile”, deklaroi Bytyqi.
Ai shtoi se, sipas vlerësimit të tij, Kurti kishte kuptuar se një përshkallëzim i situatës mund ta fuste vendin në një krizë të thellë.
Në fund, Bytyqi e cilësoi propozimin e Justina Shiroka-Pulës si një lëvizje politike të Kurtit, për të cilën tha se e kishte vënë PDK-në në pozitë që ta votonte kandidaten për presidente.
“Shahu i fundit që e ka bërë Kurti […] është se ia ka nxjerrë PDK-së Justina Shiroka-Pulën dhe këta nuk kanë pasur çare pa e votuar”, përfundoi Bytyqi.
