Sot në Bruksel po zhvillohet takimi mes emisarit të Bashkimit Evropian për dialogun Kosovë-Serbi, Miroslav Lajçak, kryenegociatorit të Kosovës në dialog, Besnik Bislimi dhe kryenegociatorit serb, Petar Petkovq për çështjen e dinarit serb.
E profesori universitar Seb Bytyqi, tha se Serbia në këtë takim do ta ketë të veshtirë që ta argumentojë transferin e dinarëve me thaës pasi sipas tij, ajo mënyrë siç ka funksionuar deri më tash në Republikën e Kosovës nuk mund të vazhdojë më.
“Serbia e ka shumë vështirë që të argumentojë që dëshiron ta vazhdojë sistemin e transferit të dinarëve me thasë, do me thënë ajo mënyrë si kanë funksionuar gjërat nuk mund të vazhdojë më. Është shumë vështirë që të argumentohet pro atij sistemi”, tha Bytyqi në emisionin “Ditari” në Tëvë1.
Sipas Bytyqit, nga ky takim është i mundur një pajtim apo marrëveshje që përfshinë transfere përmes ndonjë banke komerciale dhe jo drejtpërdrejtë në kontot që kontrollohen nga Banka Qendrore.
Edhe pse sipas tij, nevojitet kohë për një gjë të tillë, shkruan teve1.info.
“Kështu që në një mënyrë apo tjetër duhet të formalizohet transferi përmes bankave, nëse jo përmes bankave qendrore atëherë përmes ndonjë banke komerciale. Dhe është e mundur që të arrihet një pajtim i tillë edhe pse mund të merr kohë, mund të ketë pengesa sipas të gjitha gjasave. Mendoj se do të ketë një kompromis transferi, do të ketë pra një marrëveshje që përbën apo përfshinë transfere përmes ndonjë banke komerciale dhe jo direkt në kontot që mund të llogariten që kontrollohen nga Banka Qendrore e Kosovës. Dhe kështu mendoj do të jetë thelbi i kompromisit”, tha më tej Bytyqi.
Kujtojmë se javën e kaluar Bashkimi Evropian bëri të ditur se temë diskutimi në këtë takim do të jetë Rregullorja e Bankës Qendrore të Kosovës lidhur me dinarin, ndonëse nga Qeveria e Kosovës në vazhdimësi kanë deklaruar se për këtë çështje nuk do të diskutohet në Bruksel.
Derisa kryenegociatori i Kosovës, Besnik Bislimi pas takimit tha se bisedimet përfunduan me zotimet e palëve që, deri më 22 mars, t’i dorëzojnë propozimet e tyre për zgjidhjen e çështjes së përdorimit të dinarit serb në Kosovë.
Për javën e ardhshme, ai paralajmëroi një takim tjetër, për të parë nëse propozimet e tyre mund të shndërrohen në një të vetëm që, siç tha, “do të ishte i pranueshëm për Kosovën”./teve1.info./
