Mesfushori i Ballkanit, braziliani Giovanni Ribeiro e ka fituar epitetin e futbollistit më të mirë për xhiron e shtatë në Superligën e Kosovës në futboll.
FFK-ja, të hënën ka njoftuar se Ribeiro është nderuar me çmimin “Ylli i Javës”, i cili ndahet pas përfundimit të çdo xhiroje për lojtarin me performancën më të mirë.
Komisioni i Veteranëve të futbollit, ka konstatuar se braziliani pati paraqitje fantastike në xhiron e fundit, pasi shkëlqeu në fitoren e thellë të Ballkanit.
Ballkani, triumfoi 4:0 në shtëpi kundër Ferizajt, ndërsa Ribeiro kontribuoi me dy gola të realizuar.
Madje, të dy golat e Giovannit ndaj Ferizajt ishin unikë, ku të dytin personal e realizoi me gërshërë.
Pasi mori çmimin, braziliani u shpreh shumë I lumtur me vlerësimin, mbi të gjitha shtoi se e rëndësishme për të ishte fitorja e Ballkanit.
“Duhet të vazhdojmë të punojmë gjatë kësaj jave, për të bërë një ndeshje të madhe të dielën dhe për të punuar për një kampionat të mirë, që në fund të shpallemi kampionë”, tha Giovanni, i cili falënderoi trajnerët, bashkëlojtarët dhe stafin e Ballkanit për ndihën që po i japin.
Deri më tani, Giovanni ka shënuar 4 gola në 7 ndeshje të luajtura në elitën e futbollit kosovar.
