Borrell para medieve të enjten, ka bërë thirrje që të largohen barrikadat si dhe Kosova e Serbia të kthehen në dialog, pasi sipas tij, kjo është rruga e vetme për perspektivën evropiane të të dyja vendeve.
Borrell tutje ka theksuar se po bën përpjekje që të ulen tensionet duke e dërguar edhe emisarin e BE-së për dialogun Kosovë – Serbi, Miroslav Lajçak, në Prishtinë e Beograd.
“Do t’i informoj liderët për situatën dhe do t’u kërkoj [të gjithëve në rajon] që ta qetësojnë situatën dhe t’i kthehen dialogut – që është rruga e vetme për perspektivën evropiane të Kosovës dhe Serbisë. Është absolutisht e rëndësishme që këto lloj telashe të ndalen, të hiqen barrikadat, të ktheheni në stabilitet dhe të ktheheni në diskutime – diskutimi për propozimin që kemi vënë në tryezë, për të kërkuar një zgjidhje koherente dhe të përhershme të tensioneve ndërmjet Prishtinës dhe Beogradit”.
Në veri të Kosovës që nga e shtuna serbët kanë vendosur disa barrikada në rrugë, pas arrestimit të ish-policit serb, Dejan Pantiq i dyshuar për sulme ndaj zyrave të KKZ-së në veri dhe patrullave të Policisë së Kosovës.
Pas kësaj situate Policia e Kosovës për shkaqe sigurie ka mbyllur dy pikat kufitare në kufi me Serbinë atë në Jarinje dhe Bërnjak./teve1.info
