Ish-reprezentuesi i Kombëtares së Italisë, Leonardo Bonucci së shpejti do të ketë një rol të ri në stafin e elektorit Luciano Spalletti.
Bonucci do të angazhohet për ta ndihmuar Spallettin pas dështimit të Italisë në “Euro 2024”, ka raportuar të mërkurën “Tuttosport”.
Italia u eliminua në 1/8 e finales të Kampionatit Evropian pasi u mposht nga Zvicra me rezultatin 2:0, ndërsa mënjeherë pas eliminimit nga ky turne, Federata e Futbollit të Italisë e konfirmoi Spallettin në krye të ekipit deri në vitin 2026.
Bonucci pritet të angazhohet si shef i delegacionit të Italisë, post nga i cili pritet të largohet ish-portieri Gianluigi Buffon.
Bonucci në muajin maj të këtij viti është tërhequr nga futbolli aktiv, ndërsa ka një karrierë të pasur si futbollist, ku për pjesën më të madhe të saj ka luajtur për skuadrën e Juventusit.
Ai ka regjistruar 121 paraqitje për Italinë, ku ka shënuar 8 gola ndërsa e ka fituar edhe Kampionatin Evropian në vitin 2021.
