Pas vendimit të Këshillit të Ministrave të Bashkimit Evropian për liberalizimin e vizave për Kosovën, ka reaguar edhe zëvendëskryeministri, Besnik Bislimi.
Këtë vendim, Bislimi e ka quajtur hap të rëndësishëm, teksa thotë se po shkojnë drejt përfundimit të procesit, shkruan teve1.info
“Një hap i rëndësishëm drejt liberalizimit të vizave për qytetarët e Republikës së Kosovës. Me votimin unanim dhe miratimin e sotëm të Këshillit të Ministrave të BE-së, për liberalizimin e vizave për Kosovën, shkojmë drejt fazave të fundit dhe përfundimit të procesit”, ka shkruar ai në një postim në Facebook.
Sipas tij, pritja e gjatë po shkon hap pas hapi drejt fundit, ku qytetarët do të mund të lëvizin pa viza nga 1 janari i 2024-ës.
“Procedurat e mbetura janë miratimi nga Parlamenti Evropian, nënshkrimi dhe publikimi në gazetën zyrtare të BE-së. Presim që këto hapa të përfundojnë zyrtarisht brenda pjesës së parë të këtij viti. Pritja e gjatë po shkon hap pas hapi drejt fundit, ku qytetarët do mund të lëvizin pa viza nga 1 janari 2024”, përfundoi Bislimi.
Pas heqjes së regjimit të vizave nga shtetet e BE-së, qytetarët e Kosovës do të mund të qëndrojnë në vendet e BE-së pa vizë në periudhë prej 90 ditëve, brenda afatit kohor prej 180 ditëve. Kështu ka bërë të ditur presidenca suedeze e Këshillit të BE-së. /Teve1.info/
https://teve1.info/lajmet/kosovaret-mund-te-qendrojne-90-dite-ne-be-pa-viza/
