Ish-kryeministri i Suedisë, Carl Bildt, ka uruar Kosovën dhe Serbinë për arritjen e marrëveshjes së dakorduar mbrëmë në Ohër.
Bildt e ka cilësuar hap të rëndësishëm arritjen e marrëveshjes drejtë të ardhmes të të dyja vendeve.
Ai ka thënë se zbatimi i marrëveshjes do të kërkojë monitorim dhe menaxhim shumë të ngushtë në vitet në vijim, si dhe mësimet e marrëveshjes së vitit 2013 nuk duhet të harrohen.
“Mësimet e marrëveshjes së 2013-ës nuk duhet të harrohen. Ka paqartësi që do të kërkojnë vigjilencë”, ka thënë Bildt në Twitter.
Tutje, ai ka uruar ndërmjetësuesit për arritjen e marrëveshjes, shefin e Diplomacisë së BE-së, Josep Borrell dhe përfaqësuesi special të Bashkimit Evropian për dialogun mes Kosovës dhe Serbisë, Miroslav Lajçak, duke thënë se koordinimi me ShBA-në ka qenë i rëndësishëm.
“Urime Miroslav Lajçakut dhe Josep Borrellit për arritje të kësaj marrëveshje, pas viteve diplomaci të durueshme. Koordinimi me SHBA-në po ashtu ka qenë i rëndësishëm. Por, më kryesore urime Kosovës dhe Serbisë për një hap të rëndësishëm drejt të ardhmeve të tyre”, ka shkruar Bildt.
Congratulations to @MiroslavLajcak @JosepBorrellF for achieving an agreement after years of patient diplomacy. Coordination with the 🇺🇸 has also been important. But primarily congratulations to 🇽🇰 and 🇷🇸 for a step important to their respective futures. https://t.co/LNVdM1IMoS
— Carl Bildt (@carlbildt) March 19, 2023
Dje, gjatë takimit në Ohër, kryeministri i Kosovës, Albin Kurti dhe presidenti i Serbisë, Aleksandar Vuçiq janë pajtuar që ta implementojnë aktin e zbatimit të marrëveshjes së dakorduar më 27 shkurt në Bruksel. Ndërkaq, Kurti, bëri të ditur se u arrit pajtim publik për një aneks që udhëzon zbatimin e Marrëveshjes, derisa akuzoi Serbinë se i iku sërish nënshkrimit.
