Bilanci i viktimave nga tërmetet e fuqishme që goditën Venezuelën ka arritur në 920 të vdekur, ndërsa mbi 3.360 persona kanë mbetur të lënduar, sipas të dhënave të fundit të autoriteteve.
Ekipet e kërkim-shpëtimit vazhdojnë operacionet në zonat më të goditura, pasi besohet se qindra persona ndodhen ende nën rrënojat e ndërtesave të shembura. Ndihma ndërkombëtare dhe ekipet e emergjencës kanë nisur të mbërrijnë në vend për të mbështetur autoritetet në përballimin e situatës.
Tërmetet me magnitudë 7.2 dhe 7.5, që goditën vendin të mërkurën në mbrëmje, shkaktuan dëme të mëdha në Karakas dhe zonat përreth, duke u konsideruar ndër lëkundjet më të fuqishme që ka përjetuar Venezuela në më shumë se 100 vjet.
Autoritetet kanë paralajmëruar se numri i viktimave mund të rritet edhe më tej, pasi mijëra persona rezultojnë ende të zhdukur. Sipas mediave ndërkombëtare, në platformën e krijuar për raportimin e personave të pagjetur janë regjistruar rreth 50 mijë kërkesa nga familjarët që kërkojnë të afërmit e tyre.
Ndërkohë, operacionet e kërkimit dhe shpëtimit po vazhdojnë pa ndërprerje, ndërsa autoritetet u kanë bërë thirrje qytetarëve të ndjekin udhëzimet e emergjencës dhe të shmangin zonat e rrezikuara.
