Bashkësia Islame e Kosovës (BIK) ka reaguar pas publikimeve të disa portaleve dhe emisioneve që, sipas saj, po zhvillojnë një fushatë denigruese ndaj Myftiut të Kosovës, Naim ef. Tërnava.
Në komunikatën e publikuar, BIK e ka quajtur të orkestruar këtë fushatë, duke theksuar se ajo po bazohet në “shpifje, insinuata dhe pretendime krejtësisht të pavërteta”.
“Në asnjë mënyrë, në asnjë rrethanë dhe asnjëherë, as Myftiu Naim ef. Tërnava dhe as ndonjë anëtar i familjes së tij nuk kanë të bëjnë me pretendimet e ngritura ditëve të fundit nga qarqe dhe portale të ndryshme”, thuhet në reagimin e BIK-ut.
Sipas institucionit fetar, shkrimet e para lidhur me këtë çështje janë injoruar, mirëpo vazhdimi i publikimeve “me pretendime të rreme se gjoja një i afërm i Myftiut është i përfshirë në çështje të fajdeve” ka bërë që BIK të dalë me qëndrim zyrtar.
“Jemi të vetëdijshëm se fushata të tilla kundër Myftiut Tërnava i konvenojnë shumëkujt dhe shumë qarqeve, për shkak të punës dhe aktivitetit të tij të pandalshëm në të mirë të Bashkësisë Islame, të komunitetit dhe të vendit”, thuhet më tej.
Në fund, BIK thekson se të gjitha pretendimet e publikuara në media janë të pavërteta dhe se fushata të tilla, siç thuhet në komunikatë, “do të përfundojnë të turpëruara”.
