Shënon rënie e numri i nxënësve në arsimin parauniversitar dhe e studentëve në arsimin e lartë. Kështu bën të ditur Agjencia e Statistikave të Kosovës (ASK) në publikimin e të dhënave mbi statistikat e arsimit për vitin shkollor dhe akademik 2025/2026. Derisa sipas këtij raporti, ka një rritje të lehtë të numrit të fëmijëve në çerdhe dhe institucionet parashkollore.
Sipas ASK-së, numri i fëmijëve të përfshirë në çerdhe dhe parashkollor gjatë vitit shkollor 2025/2026 arriti në 35 mijë e 948, ose 1 mijë e 910 më shumë krahasuar me vitin paraprak, kur ishin regjistruar 34 mijë e 38 fëmijë.
Nga numri i përgjithshëm, 24 mijë e 422 fëmijë apo 67.9 për qind vijojnë edukimin në institucionet publike, ndërsa 11 mijë e 526 ose 32.1 për qind në ato private.
Në anën tjetër, ASK njofton se numri i nxënësve në arsimin fillor dhe të mesëm të ulët ka rënë në 198 mijë e 639, nga 208 mijë e 515 sa ishte një vit më parë. Prej tyre, 194 mijë e 314 ndjekin mësimin në sektorin publik, ndërsa 4 mijë e 325 në atë privat, përcjell KosovaPress.
“Numri i nxënësve në arsimin fillor dhe të mesëm të ulët në vitin shkollor 2025/2026 ishte 198 639, prej tyre në sektorin publik ishin 194 314 ose 97,8 % dhe në sektorin privat 4 325 ose 2,2 %. Ndërkaq, në vitin shkollor 2024/2025 numri i nxënësve ishte 208 515, prej tyre në sektorin publik ishin 199 190 ose 95,5 % dhe në sektorin privat 9 325 ose 4,5 %”, thuhet në raportin e ASK-së.
Të dhënat tregojnë se pjesëmarrja në sektorin publik është rritur në përqindje, ndërsa sektori privat ka shënuar ulje të numrit të nxënësve krahasuar me vitin shkollor 2024/2025.
Rënie është evidentuar edhe në arsimin e mesëm të lartë. Gjatë vitit shkollor 2025/2026 janë regjistruar 62 mijë e 85 nxënës, kundrejt 63 mijë e 551 sa ishin një vit më parë.
Në shkollat publike vijojnë mësimin 56 mijë e 892 nxënës ose 91.6 për qind e totalit, ndërsa në ato private 5 mijë e 193 nxënës apo 8.4 për qind. ASK vlerëson se, megjithëse numri i përgjithshëm ka rënë, sektori privat ka shënuar një rritje të lehtë të pjesëmarrjes.
Sipas raportit, rënie e lehtë është regjistruar edhe në arsimin e lartë. Numri i studentëve për vitin akademik 2025/2026 ishte 64 mijë e 671, krahasuar me 64 mijë e 817 në vitin paraprak.
Nga ta, 34 mijë e 208 studentë apo 52.9 për qind studiojnë në universitetet publike, ndërsa 30 mijë e 463 ose 47.1 për qind në kolegjet private.
Krahasuar me vitin 2024/2025, universitetet publike kanë më pak studentë, ndërsa institucionet private të arsimit të lartë kanë shënuar rritje të numrit të regjistrimeve.
