Deputeti i Partisë Demokratike të Kosovës, Hisen Berisha, thotë se kryeministri i vendit, Albin Kurti, po gënjen derisa thotë që po punohet në rrugën Prishtinë – Podujevë.
Berisha ka bërë të ditur se ka vizituar këtë aks rrugor dhe nga atje ka publikuar disa fotografi, që sipas tij dëshmojnë se nuk është duke u punuar në turnin e tretë.
“Me shpurën tënde të mashtruesve, improvizuat një vizitë në lotin, ku po kryhen punime, në rrugën Bardhosh, Trudë, Lebanë, Besi, Kulinë, Lupq i Poshtëm, Shakovicë, Lluzhan, në Aksin Prishtinë- Podujevë, (duke i detyruar punëtoret e kompanisë punëkryese, të ndezin makineritë dhe të improvizojnë, sikur po punohet në tre turne). Sonte e vizitova Podujevën, e në periudhën kur fillon turni i tretë, nga ora 22, deri 01h, pas mesnate, vizitova lotet ku po kryhen punimet. Për kureshtje ti bëra disa fotografi e video dëshmi. Nuk po u punuaka në turn të tretë, Kryeministër! E tani po e shoh se as në rrugën Klinë – Gjakovë, në lotin Rakovinë – Kodra e Becit, nuk po punohet, as në dy turne së paku”, ka shkruar deputeti opozitar.
Tutje, ai ka shkruar se Kurti këtë e ka përdorur si strategji, meqë pozita po hyjnë në vit elektoral, e që sipas tij, po mundohet t’i rrisë investimet publike.
“Si mashtrues patologjik, po e dini se po hyjmë në vit elektoral, e tani po mundoheni ti rrisni investimet publike, që i keni penguar e ndaluar, për tre vite. Veprim tipik prej mashtruesi. Jo, Kryeministër! Nuk do të lejojmë ti mashtrosh qytetarët më! As edhe ata që ju i quani “analfabet funksional”, se ky popull i vuajtur për liri e mirëqenie, nuk meriton të mashtrohet. Demaskimi i politikave tuaja mashtruese, që tani po rezultojnë edhe të konfirmuara me Radojçiqa e Simiça të Beogradit, është edhe një motiv shtesë, pse do të jem në Kuvendin e Kosovës”, ka shkruar tutje ai./teve1.info/
