Një ditë pas protestës kombëtare në Tiranë, kryetari i Partisë Demokratike, Sali Berisha zhvilloi një bashkëbisedim me qytetarët në rrjetet sociale, ku theksoi qëndrimin e tij për 20 shkurtin dhe për hapat e ardhshëm të opozitës.
Që në nisje të komunikimit, ai e cilësoi protestën si një moment kulmor të përballjes me qeverinë, duke deklaruar se “dje ishte ditë triumfi për kryengritësit paqësorë të pamposhtur”.
Kreu i PD-së e cilësoi protestën si më të fuqishmen që ka njohur Shqipëria pas 20 shkurtit 1991.
Berisha theksoi se protesta jehoi dhe u shndërrua në mënyrë të rrufeshme në kryelajm jo vetëm në mediet shqiptare, por edhe në ato më të mëdha të Gjermanisë, Francës, Britanisë, Austrisë dhe të SHBA.
“PD është në një kryengritje paqësore. Asnjë anëtar i forcave të rendit nuk është gërvishtur gjatë gjithë protestave tona.Protesta nuk është e PD, nuk është protestë e opozitës, është protestë e çdo shqiptari, për dinjitet”, tha Berisha.
Berisha vuri në dukje se protesta është një betejë misioni jetik, që lidhet me zgjedhjet e lira, luftën kundër korrupsionit dhe integrimin europian të Shqipërisë.
Ai shprehu bindjen se opozita do e përmbushë me dinjitet këtë mision./atsh
