Kryetari i Partisë Liberale Egjiptiane dhe ish-deputeti i Kuvendit të Kosovës, Veton Berisha duke folur për vendimin e Gjykatës Kushtetuese në lidhje me ankesën e tij dhe të Albert Kinollit për dyshimet për orkestrimin e votave nga ana e partisë Iniciativa Rome dhe Listës Serbe në vendbanimet me shumicë serbe në zgjedhjet e 14 shkurtit 2021, ka thënë se kjo lëndë është dashur të trajtohet me prioritet.
Kjo sepse sipas Berishës, ata po humbin mundësinë tash e dy vite për të qenë pjesë e Kuvendit të Kosovës nga komuniteti egjiptian.
“Ne kemi dy vite që po e humbim mundësinë për të qenë pjesë e Kuvendit të Kosovës nga komuniteti egjiptian dhe për të ndihmuar në komunitet, dmth kjo është humbja kryesore që ka ndodhë në këtë proces. Ndërsa në rast se vendimi nuk do të merret në favor të kërkesës sonë, atëherë kam frikë që Kosova do të jetë gjithmonë e atakuar përballë një padrejtësie e cila ka ndodhë nga Lista Serbe me rastin e orkestrimit të votave”, tha ai në emisionin “Ditari”.
Madje ai tha se nëse kërkesa e tyre nuk do të pranohen në zgjedhjet e ardhshme sipas tij, Lista Serbe do të vijë në 15 deputetë.
“Në rast se nuk do të pranohet si e tillë kërkesa jonë do të anulohen ato vota të cilat ishin krijuar sipas orkestrimit. Unë besoj se në zgjedhjet e ardhshme Lista serbe do të vie në 15 deputetë. Unë do të ndihesha shumë i lumtur nëse këtë “atak politik”, me thanë do të arrija me punën tonë ta ndalnim, dmth unë mendoj që kemi dhënë kontribut dhe prersim që vendimi të jetë në favorin tonë”, tha më tej Berisha./teve1.info./
