Shkëputja e kontratës kolektive në fushën e arsimit nga ana e Qeverisë po konsiderohet e kundërligjshme nga avokatja, Bega Berisha. Ajo thotë se kjo lloj shkëputje është jo e drejtë.
Berisha theksoi se mësimdhënësit duhet t’i drejtohen institucioneve në mënyrë që t’i kërkojnë të drejtat e tyre.
“Shkëputja e kontratës nga ana e Qeverisë në nëntor të vitit 2022 konsiderojmë se është shkëputje jo e drejtë, e kundërligjshme. Të gjithë mësimdhënësit të cilët përfitojnë nga kjo kontratë duhet t’i drejtohen institucioneve përkatëse për realizimin e të drejtave të tyre të cilat burojnë nga kjo kontratë. Pasi që nuk ka qenë i drejtë vendimi i Qeverisë për shkëputjen e kësaj kontrate. Besoj që edhe institucioni arsimor janë në dijeni të këtyre rasteve që janë duke u zhvilluar nëpër Gjykata, dhe asnjëherë Qeveria si palë nënshkruese, vullnetarisht nuk i ka kryer detyrimet të cilat derivojnë nga kontrata kolektive”, deklaroi ajo në rubrikën Këshilla Jurdike gjatë emisionit “Herët” në Tëvë 1.
Avokatja Berisha po ashtu potencoi se e vetmja rrugë të cilën mësimdhënësit mund të ndjekin është t’i drejtohen Gjykatës me kërkesa për padi, për realizimin e të drejtave.
Më 22 nëntor, Ministria e Arsimit, Shkencës, Teknologjisë dhe Inovacionit (MASHTI) e ka shkëputur Kontratën Kolektive me Sindikatën e Bashkuar e Arsimit, Shkencës dhe Kulturës së Kosovës (SBASHK).
Kontrata Kolektive ishte nënshkruar në janarin e vitit 2021 nga ministri i Arsimit aso kohe, Ramë Likaj, dhe kryetari i SBAShK-ut, Rrahman Jasharaj.
E njëjta i siguronte mbulimin e shpenzimeve të udhëtimit për mësimdhënës, kompensimin e shujtës, shpërblimin jubilar dhe beneficione të tjera për punëtorët e arsimit. /Teve1.info/
