Presidenti i Republikës së Shqipërisë, Bajram Begaj, ka nisur vizitën e tij në Luginën e Preshevës me takime me përfaqësuesit politikë dhe institucionalë të shqiptarëve të kësaj treve.
Gjatë qëndrimit në Luginë, Begaj u takua me kryetaren e komunës së Preshevës, Ardita Sinani, kryetarin e komunës së Bujanocit, Arbër Bajaziti, deputetin shqiptar në Parlamentin e Serbisë, Shaip Kamberi, si dhe kryetarin e Këshillit Kombëtar Shqiptar të Luginës së Preshevës, Enkel Rexhepi.
Në fokus të diskutimeve ishin shqetësimet e komunitetit shqiptar, forcimi i bashkëpunimit politik dhe projektet që synojnë mbështetjen e zhvillimit të rinisë në këtë zonë.
Përmes një postimi në rrjetin social Facebook, Presidenti Begaj deklaroi se shqiptarët e Luginës së Preshevës jetojnë në trojet e tyre, por ndodhen jashtë kufijve të Shqipërisë.
“Vizitova sot Luginën e Preshevës, ku jetojnë shqiptarë në trojet e veta, fatkeqësisht jashtë trupit amë. Më pritën me flamur e zemrat plot dashuri, si vëllai pret vëllanë. Biseduam me kryetarët e komunave, Ardita Sinani dhe Arbër Bajazitin, deputetin e vetëm shqiptar në Parlamentin e Serbisë, Shaip Kamberin, dhe kryetarin e Këshillit Kombëtar Shqiptar të Luginës së Preshevës, Enkel Rexhepin, për adresimin e shqetësimeve të shqiptarëve të Luginës, për forcimin e bashkimit të faktorit shqiptar, si edhe për projektet që do të ndihmojnë rininë e këtushme”, ka shkruar Begaj.
Ai u bëri thirrje liderëve politikë të kësaj treve që të bashkohen sa herë që është në interes të mbrojtjes së të drejtave të shqiptarëve.
Begaj theksoi se Shqipëria do të vazhdojë të mbështesë adresimin e çështjeve që lidhen me Luginën e Preshevës, përfshirë përfaqësimin e drejtë në institucione, shqetësimet për pasivizimin e adresave, si dhe të drejtën e përdorimit të gjuhës amtare dhe simboleve kombëtare.
Ai u shpreh se do të vazhdojë të angazhohet për ngritjen e këtyre çështjeve në institucionet dhe kancelaritë ndërkombëtare.
“Si President i Republikës së Shqipërisë, u garantova mbështetjen e Shqipërisë për adresimin e çështjes së Luginës së Preshevës, përfaqësimin e drejtë në institucione, shqetësimin për pasivizimin e adresave, si dhe të drejtën e përdorimit të gjuhës amtare dhe të simboleve kombëtare.I sigurova se do të vazhdoj të jem, si deri më tani, avokat i tyre, avokat i të drejtave të mohuara të shqiptarëve të Luginës në çdo institucion dhe kancelari ndërkombëtare”, ka përfunduar ai./teve1.info/
