Presidenti i Shqipërisë, Bajram Begaj, ka pritur një përfaqësi të Këshillit të Ambasadorëve Amerikanë, të kryesuar nga presidenti i këtij këshilli, Ambasadori Timothy A. Chorba.
Begaj në takim me diplomatët amerikanë ka folur edhe për dialogun Kosovë-Serbi, për të cilën ka thënë se duhet të përfundojë me njohje të ndërsjellë.
“Në mënyrë të veçantë, Presidenti Begaj u ndal te kontributi i Shqipërisë për paqen, stabilitetin dhe ndërtimin e frymës së fqinjësisë së mirë në rajon, duke nënvizuar më tej edhe mbështetjen që Shqipëria i jep dialogut mes Kosovës dhe Serbisë, si e vetmja alternativë për arritjen e një marrëveshjeje ndërkombëtarisht të detyrueshme, me në qendër njohjen e ndërsjellë të tyre”, thuhet në një komunikatë të presidencës së Shqipërisë.
