Bebe Rexha ka paralajmëruar rikthimin e saj të madh në skenën muzikore me një projekt ambicioz, albumin e ri vizual të titulluar “Blonde Dirty”.
Përmes një videoje në Instagram, këngëtarja ka zbuluar pamje ekskluzive nga koncepti i projektit, duke prezantuar një univers artistik të kuruar me kujdes, plot estetikë kinematografike dhe skena dinamike.
Albumi do të vijë në format “visual album”, që do të thotë se çdo këngë do të shoqërohet me videoklip, duke e kthyer në një eksperiencë të plotë audio-vizuale.
Një nga detajet që ka ndezur menjëherë rrjetin është titulli i këngës hapëse, “Çike çike”, që lë të kuptohet se artistja do të sjellë një këngë në shqip, duke emocionuar veçanërisht fansat shqiptarë.
Në album përfshihen edhe tituj si “$HIT”, “Tokyo”, “Hysteria”, “New Religion”, “Time”, “I Like You Better Than Me”, “Nobody’s There”, “The Way I Want You”, “Drink And A Little Love”, “One Day”, “Nightfalls” dhe “Sad Girls”, që premtojnë një udhëtim mes rebelimit, dashurisë, identitetit dhe reflektimit personal.
Pas një periudhe më të qetë gjatë vitit të kaluar, Bebe Rexha duket e gatshme të hapë një kapitull të ri në karrierën e saj me një projekt që pritet të ketë jehonë ndërkombëtare.
