Bayern Munich po shqyrton mundësinë për të përforcuar skuadrën në afatin kalimtar veror dhe vëmendja e klubit gjerman duket se është rikthyer te Chelsea.
Bavarezët kanë kohë që tregojnë interes për mbrojtësin Malo Gusto dhe kjo u përmend edhe në edicionin e fundit të podcastit “Bayern Insider” të Bild.
Sipas raportimeve, Chelsea do të ishte i gatshëm të shiste francezin, kontrata e të cilit zgjat deri në vitin 2030, për një shumë rreth 50 milionë euro.
Gusto është lojtari i dytë i Chelseat që është lidhur me Bayernin pasi edhe Christopher Nkunku shihet si një opsion, pasi ai vetë thuhet se dëshiron një transferim.
Megjithatë, transferimi i Gustos nuk është prioritet për momentin për drejtuesit e klubit. Ata synojnë së pari të afrojnë një sulmues për krahun e majtë.
Në skuadrën aktuale të Bayernit janë tashmë tre mbrojtës të djathtë: Sacha Boey, Konrad Laimer dhe Josip Stanisic.
Vetëm nëse ndonjëri prej tyre largohet, pista për Guston mund të rihapet dhe të bëhet më konkrete.
