KB Bashkimi nuk e ka nisur vitin 2026 në mënyrën më të mirë të mundshme, pasi në ditët e para të këtij viti ka marrë një goditje të rëndë.
Amerikani Kyan Anderson, njëri prej lojtarëve kryesor të ekipit nga Prizreni këtë sezon është lënduar dhe do të qëndrojë jashtë parketit deri në fund të muajit shkurt.
Bashkimi, të mërkurën ka njoftuar se Anderson në stërvitjen e fundit ka pësuar një lëndim në krahun e majtë, shkaku i të cilit do të mungojë prej 4 deri në 6 javë, kanë konstatuar ekzaminimet e para.
Po ashtu, Bashkimi ka bërë të ditur se gjendja e Andersonit do të monitorohet vazhdimisht nga stafi mjekësor, ndërsa amerikani i ka uruar shërim sa më të shpejtë.
Anderson është pjesë e Bashkimit prej fillimit të këtij sezoni, ku krahas Superligës së Kosovës, paraqitje të mira pati edhe në fazën grupore të FIBA Europe Cup.
Në kampionatin e Kosovës, Anderson po luan me një mesatare prej 16 pikëve, 4 kërcimeve dhe 6 asistimeve për ndeshje.
Aktualisht, Bashkimi renditet i dyti në elitën e basketbollit kosovar me 22 pikë, një më pak se Trepça që është e para pas 13-të xhirove të zhvilluara.
