Bashkimi i Prizrenit ka vazhduar me bilanc të qindpërqindtë në elitën e basketbollit të Kosovës, ndërsa ia ka shkaktuar Sigal Prishtinës disfatën e parë të sezonit.
Bashkimi që në “FIBA Europe Cup” ka tri humbje në po aq ndeshje të luajtura në Grupin J, në Superligë vazhdon paraqitjet e mira. Ka katër fitore në po aq ndeshje.
E ka mposhtur Vëllaznimin, Rahovecin 029 e Trepçën, derisa të shtunën në xhiron e katërt fitoi bindshëm edhe ndaj Sigal Prishtinës.
Ndeshja e zhvilluar në palestrën “Sezai Surroi” u mbyll 106:88.
Çerekun e parë e të dytë, Bashkimi i fitoi 22:19 dhe 29:17, për të shkuar në pushim me epërsi prej 15 pikëve, 51:36.
Sigal Prishtinës i takoi vetëm periudha e tretë, 30:27, ndërsa Bashkimi e fitoi edhe çerekun e fundit, 28:22.
Kyan Anderson ishte i pandalshëm te prizrenasit me 31 pikë, tetë asistime e dy kërcime.
Lojë shumë të mirë patën edhe Isaiah Cousins dhe Dequon Lake. Cousins e mbylli ndeshjen me 23 pikë, katër asistime e tri kërcime, kurse Lake pati 15 pikë, gjashtë kërcime e tri asistime.
TJ Bickerstaff kontribuoi me 18 pikë, katër kërcime e dy asistime. Prej lojtarëve vendor, Jan Palokaj shënoi shtatë pikë, Valon Bunjaku pesë pikë dhe Lejson Zeqiri tri pikë.
Prishtinës nuk i ndihmoi loja e mirë e Arian Azemit për ta shmangur disfatën. Azemi shënoi 22 pikë, pesë asistime e një kërcim. Ndërkohë, Adrio Bailey i pati 20 pikë, pesë kërcime e një asistim.
Për Sigal Prishtinën ishte disfata e parë pas gjashtë fitoreve në të gjitha garat.
Në Superligën e Kosovës, Sigal Prishtina kishte fituar ndaj Golden Eagle Yllit, Borës dhe Rahovecit 029. Tri fitore i pati edhe në ligën ENBL.
