Skuadra e Barcelonës i ka bërë ofertë zyrtare Lionel Messit për t’u kthyer në “Camp Nou”. Mediumet spanjolle kanë bërë të ditur të enjten se oferta e Barçës është dukshëm më e ulët se e Paris Saint-Germainit dhe nëse Messi dëshiron të rikthehet tek ekipi spanjoll, atëherë duhet të bëjë sakrificë të madhe.
Barcelona i ka ofruar sulmuesit argjentinas kontratë dyvjeçare me pagë vjetore prej 13 milionë eurosh, të përafërt me atë të polakut Robert Lewandowski. Messi në fund të sezonit do të mbetet lojtar i lirë, ndërsa te Parisi ka pagë vjetore prej 30 milionë eurosh.
Ekipi francez po dëshiron të mbajë Messin të paktën deri në vitin 2025, por 35-vjeçari ende nuk ka marrë vendim për të ardhmen e tij.
Ai në vitin 2021 u largua nga Barça si lojtar i lirë dhe iu bashkua PSG-së, ekip për të cilin këtë sezon ka shënuar 20 gola dhe ka bërë 18 asistime në 35 paraqitje.
