Ishte në gjendje të mjerueshme nënkalimi në lagjen “Emshir” që lidh pjesën e kryeqytetit me lagjen “Dardania”.
Pas intervenimit të komunës së Prishtinës, hapësira u pastrua.
Për Vesel Hamitin që kalon çdo ditë nëpërmjet këtij nënkalimi, aroma këtu është e padurueshme.
“Sot po doket mirë e paskan pastru pak megjithatë këtu gjithherë është me mbeturina, është era e padurueshme, kështu që nuk ka koment”, tha Hamiti.
Gjendjen si tejet të rëndë sa herë kalon këndej e përshkruan edhe Vllaznim Salihu.
“Gjendja është katastrofë, e mjerueshme, era po i vjen, mbeturina sa të duash po i hedhin pa ndal kurrë, është katastrofë”, tha Salihu.
Ndërsa nga komuna thonë se nënkalimi mirëmbahet kur është nevoja apo kur ka ankesa nga qytetarët.
“Ai pastrohet kohë pas kohe pasi që është në kompetencë të Ministrisë dhe Infrastrukturës mirëpo pasi që ata nuk marrin hapa për me mirëmbajtë ne e marrim me mirëmbajtje të rrugëve që i kemi ata e mirëmbajnë herë pas here”, tha zyrtarja për menaxhimin e mbeturinave, Shkurta Zariqi.
Meqë e gjithë kjo është në kompetenca të Ministrisë së Infrastrukturës, televizioni ka dërguar pyetje tek ky dikaster, mirëpo deri në publikimin e kësaj kronike nuk kanë kthyer përgjigje.
