Kryeministri Albin Kurti ka pritur sot në takim zëvendëspresidenten e Bankës Evropiane për Investime, Lilyana Pavlova.
Mundësia e financimit të kësaj Banke në energji, arsim e shëndetësi ishte temë diskutimi ndër të tjerash.
Po ashtu u diskutua edhe për nismën e funksionalizimit të Fondit Sovran, për të cilën ofroi mbështetje Pavlova, ka njoftuar Zyra e Kryeministrit.
“Përveç tjerash, në takim kryeministri gjithashtu foli edhe për Fondin Sovran, i cili u prezantua gjatë fundjavës që lamë pas. Me këtë rasti, Zëvendëspresidentja Pavlova shprehu gatishmërinë e EIB për të mbështetur Qeverinë në këtë nismë”, thuhet në komunikatë.
Ndërsa kryeministri Kurti ka shprehur mirënjohjen e tij për rolin dhe kontributin e Bankës Evropiane për Investime në zhvillimin e vendeve, duke e cilësuar atë si partnere të rëndësishme.
“Në 10 vitet e fundit, ky institucion financiar ka ofruar mbështetje me vlerë 241 milionë euro në sektorë të ndryshëm të ekonomisë”, thuhet në një komunikatë të Qeverisë.
Zëvendëspresidentja, Lilyana Pavlova po qëndron në Kosovë për të marrë pjesë në konferencën Vienna Economic Talks që u mbajt sot për herë të parë në Prishtinë.
