Dy skuadrat nga qyteti i Suharekës, Ballkani dhe Suhareka janë kualifikuar në gjysmëfinale të Kupës së Kosovës në futboll.
Si Ballkani ashtu edhe Suhareka, u kualifikuan në mesin e katër ekipeve më të mira të kësaj gare pasi fituan në ndeshjet e 1/4-së së finales.
Ballkani e mposhti skuadrën e Malishevës, ndërsa Suhareka triumfoi ndaj Vjosës së Shtimes. Në duelin e luajtur në stadiumin “Liman Gegaj” në Malishevë, Ballkani fitoi me rezultatin e thellë 3:0.
Dy gola në pjesën e parë dhe një tjetër në të dytën, ia siguruan Ballkanit avancimin në gjysmëfinale. Mamadou Danfa e kaloi në epërsi Ballkanin në minutën e 28-të, ndërsa në minutën e 44-të mesfushori Nazmi Gripshi e dyfishoi epërsinë.
Golin e tretë për Ballkanin dhe rezultatin përfundimtar të takimit, e vulosi Gripshi me golin e tij të dytë personal që e realizoi në minutën e 50-të.
Ndërkohë, Suhareka triumfoi në Shtime me rezultatin 1:0 ndaj Vjosës.
Golin e vetëm në këtë përballje e shënoi sulmuesi Mevlan Zeka në minutën e 80-të. Krahas Ballkanit e Suharekës, në gjysmëfinale të Kupës së Kosovës kanë avancuar edhe Prishtina e Drita.
