Deputetja e Kuvendit të Kosovës, Hykmete Bajrami, ka reaguar ndaj kryeministrit Albin Kurti lidhur me kërkesat e tij për një figurë unifikuese për president dhe sigurimin e 85 votave.
Përmes një postimi në Facebook, Bajrami ka rikujtuar situatën e vitit 2021, duke theksuar se në atë kohë nuk kanë pasur as 80 vota të sigurta dhe as kandidatja nuk ka qenë konsensuale.
Ajo ka paralajmëruar se vendi mund të përballet me një situatë edhe më të vështirë nëse shkohet sërish në zgjedhje.
“Në vitin 2021, as nuk i kanë pasë 80 vota të sigurta, as kandidatja s’ka qenë konsensuale. Sot, Kurti po kërkon figurë jopartiake/unifinuese dhe garanci me 85 vota. Veç një gjë duhet ta dimë: nëse shkojmë në zgjedhje prapë, as vota për kryetar të Kuvendit s’ka me pasë, e lëre më për president”, ka shkruar Bajrami.
Ajo ka shtuar se vendi po kalon nga një bllokadë në tjetrën dhe nga një krizë në tjetrën, duke akuzuar kryeministrin se synon kontroll të plotë mbi institucionet.
“Pra, prej bllokade në bllokadë, prej krize në krizë, me rëndësi Kurti të ketë kontroll të plotë mbi buxhetin dhe institucionet. Të mjerët ne kush po na udhëheqë! Uroj ta kuptojmë sa më parë”, ka përfunduar ajo./teve1.info/
