Deputetja e LDK-së, Hykmete Bajrami ka reaguar pas mbylljes së seancës konstituive nga kryeparlamentari Dimal Basha, duke e cilësuar këtë veprim si një shkelje e Kushtetutës.
“Ishit dëshmitarë të një shkelje flagrante të Kushtetutës, ku kryetari i sapozgjedhur mbylli seancën konstituive pa të drejtë, sepse rregullorja e thotë qartë që Kuvendi konstituohet dhe seanca mbyllet vetëm në rastin kur zgjidhet kryetari dhe të gjithë nënkryetarët”, deklaroi Bajrami pas përfundimit të seancës.
Ajo theksoi se LDK-ja kishte refuzuar votimin ndaras për nënkryetarët, duke u bazuar në një aktgjykim të Gjykatës Kushtetuese që sipas saj e obligon Kuvendin të ndjekë agjendën e dakorduar më 8 prill, ku nënkryetarët parashihej të votoheshin në pako.
“Në mbledhjen e 8 prillit është vendosur që nënkryetarë të votohen në pako. Gjykata Kushtetuese na ka urdhëruar që të ndjekim rendin e ditës. LDK s’ka votuar sepse s’është ndjekur rendi i ditës”, ka thënë Bajrami./teve1.info/
