Deputetja e LDK-së, Hykmete Bajrami ka thënë se përmes vlerës së koeficientit prej 105 eurosh qeveria ka kthyer premtimin për të ndihmuar njerëz të zakonshëm në rritjen e kostos së jetesës.
Sipas saj në disa sektorë janë thelluar dallimet.
‘Për shembull zyrtarët e lartë me koeficientës 6, 7 e 8 nëpër ministri të ndryshme me ligjin e ri të pagave dhe me vlerën 105, pagën e kanë të njëjtë me atë të muajit janar dhe kjo pritet të vërtetohet me pagën e shkurtit. Mirëpo paga e shefit të divizionit është rrit me 170 euro. Kjo nuk është aspak barazi. Me këtë ligj është prek edhe sektori i drejtësisë që konsiderohet në këtë rast ndërhyrje e drejtpërdrejtë nga ana e ekzekutivit”, ka thënë ajo.
Sipas saj një mësues i shkollës fillore do të marrë më pak me ligjin e ri.
“Postimi i kryeministrit thotë se paga bazë e mësuesit në shkollën fillore dhe të mesme të ulët është 420 euro, unë e marrë një sms nga një mësues i shkollës fillore ku thotë paga ime në muajin janar ka qenë 442 euro, paga neto. Dhe kryeministri thotë që kjo është paga bazë dhe kaq ju ka rrit, po ai harron që ajo nuk është paga bazë por paga neto. Janë ul pagat në universitetet publike të Kosovës. Vetëm dy ditë pasi Universiteti i Prishtinës ngritet për 262 vende në Webometrics, Qeveria merr vendim që t’ia ulë pagat profesorëve”, ka shtuar ajo.
Në fund ka thënë që vlera e koeficientit duhet të jetë 125 euro, me çka nuk do të dëmtohej buxheti për vitin 2023.
“Më e rëndësishmja është që nuk ësht reflektu norma e inflacionit. Andaj kemi shiku me kujdes buxhetin dhe kemi propozuar që koeficienti për vitin 2023 të jetë 125 euro. Mjetet për kosto shtesë të merren nga programi kontigjenca në Ministrinë e Financave apo programi i ringjalljes ekonomike. Ne ju bëjmë thirrje që ta përkrahin këtë amendament sepse është i arsyeshëm dhe i realizueshëm, dhe e mban buxhetin e pagave 27 % aq sa janë kërkesat e Fondit Monetar Ndërkombëtar”, ka përfunduar Bajrami.