Kandidatja për deputete e LDK-së, Hykmete Bajrami, e cila ka siguruar votat edhe për një mandat në Kuvend, ka shkruar se është mirënjohëse për votat që mori në këto zgjedhje, trefish më shumë sesa zgjedhjet e fundit.
“Personalisht, jam mirënjohëse dhe e prekur thellë nga besimi juaj. Në këto zgjedhje, deri më tani, kam marrë 49,158 vota, duke trefishuar mbështetjen nga hera e kaluar. Ky është një nder i madh dhe një përgjegjësi akoma më e madhe për mua”, ka thënë Bajrami.
Ajo tutje ka shkruar se partia e saj, e cila doli e treta në këto zgjedhje, e respekton vullnetin e qytetarëve.
Postimi i saj i plotë:
Faleminderit nga zemra!
Të dashur qytetarë,
Tani që ka përfunduar numërimi i votave të rregullta dhe në proces janë ende vetëm votat me kusht dhe ato të mërgatës, po ju drejtohem të gjithë votuesve të Lidhjes Demokratike të Kosovës, për t’ju falënderuar nga zemra secilin prej jush, që në këto zgjedhje votuat për subjektin tonë politik. Edhe pse kemi pritur më shumë, vullneti i qytetarëve është i shenjtë dhe ne e respektojmë si të tillë.
Personalisht, jam mirënjohëse dhe e prekur thellë nga besimi juaj. Në këto zgjedhje, deri më tani, kam marrë 49,158 vota, duke trefishuar mbështetjen nga hera e kaluar. Ky është një nder i madh dhe një përgjegjësi akoma më e madhe për mua.
Prej më shumë se një dekade e gjysmë, unë jam aktive në politikë vetëm falë besimit tuaj. Kam shërbyer si ministre tri herë dhe kam qenë në opozitë tri herë. Në mandatin e kaluar, kryesisht jam angazhuar në dekonstruktimin e propagandës së qeverisë dhe në mbrojtjen e mirëqenies së qytetarëve tanë. Kam dhënë maksimumin për të qenë zëri i qytetarëve dhe puna ime është shpërblyer me besimin që me keni dhënë.
Unë besoj në ju, besoj në punën time dhe besoj në ato që them. E vërteta duhet gjithmonë të thuhet me zë të lartë.
Ju falënderoj nga zemra, secilin prej jush, për votën dhe besimin që më keni dhënë!
Më keni dhënë forcë, shpresë dhe motiv që të vazhdoj të jem zëri juaj, por mbi të gjitha të angazhohem që Lidhja Demokratike e Kosovës të rikthehet aty ku e ka vendin – në shërbim të qytetarëve dhe si forca kryesore politike në vend.
