Anëtari i Lëvizjes Vetëvendosje, Alban Bajrami ka thënë se ndarja e 100 eurove për studentët nuk ka të bëjë me zgjedhje e as me balotazhin.
Duke folur për kritikat që partitë opozitare i kanë bërë Kurtit i cili të enjten njoftoi se është procesaur pagesa për grupin e parë të 100 eurove, ka thënë se Memli Krasniqi e Lumir Abdixhiku janë studentë të Kurtit.
Ai në emisionin “InfoNata” në Tëvë1 ka thënë se liderët opozitarë edhe fjalët e Kurtit i përdorin në studio televizive.
“Qeveria në detyrë është duke operuar sipas ligjit. Arsyeja pse kemi qeveri në detyrë është se kemi një opozitë që nuk janë tu e ditë çka janë tu e bë e as çfarë do. Kjo opozitë janë studentë të Albin Kurtit, nëse këta po ankohet për studentë, kjo opozitë janë studentë të Albin Kurtit. Dy liderët kryesorë të partive opozitare e imitojnë Albinin në studio televizive edhe fjalë të tij përdorin në studio televizive. Këta kanë qenë edhe mbështetës të Kurtit në periudha të ndryshme. Memli kur ka qenë reper e ka mbështetë lirimin e Albin Kurtit prej burgu, Lumiri e ka mbështetë Albin Kurtin kur ka qenë kryeministër, bile derisa i ka ra në mend që mundet me u bë kryetar partie, e ka mbështet me vazhduar koalicionin me të”, ka thënë Bajrami në Tëvë1.
Duke folur për ndarjen e 100 euro për studentët dhe fillimin e pagesës tri ditë para balotazhit, ai ka thënë se vendimi është marrë në tetor.
Ai ka thënë se Qeveria Kurti ka ndarë vazhdimisht bursa për studentët gjatë këtyre katër viteve.
“Nuk ka të bëjë aspak me balotazhin e as zgjedhjet, kjo është procedim i një pagese që ka rastisë me qenë afër balotazhit. Opozita është dashur të duartrokas vendimet kur Qeveria e Kosovës në 4 vjet ka ndarë bursa për stu. Këta nëse pretendojnë që studentët blihen me 100 euro, po u dashka me u tranua për ato që i kemi dhënë deri në 7 mijë euro për master. Nuk ka të bëjë me blerje të votës, sepse studentët nuk janë të tillë, është paragjykim me gjasë në bindjet e tyre personale”, ka thënë ai.
Studentët që kanë përfituar nga 100 euro kanë marrë njoftim nga Zyra e Kryeministrit në emër të Albin Kurtit.
Kjo ka ngjallë reagime të mëdha në opinion, ndërsa opozita e vlerësojë si tentim për blerje vote.
