Profesori i së Drejtës Kushtetuese, Arsim Bajrami vlerëson se anëtarësimi në NATO është hapi më i rëndësishëm për garantimin e sigurisë së Kosovës.
Sipas tij, anëtarësimi në këtë mekanizëm është më i lehtë sesa në Bashkimin Evropian ose në Organizatën e Kombeve të Bashkuara.
“Anëtarësimi në NATO udhëhiqet nga disa parime tjera, parime globale të sigurisë dhe aty Shtetet e Bashkuara të Amerikës e kanë rolin kryesor. Ne e dimë si është pranuar Maqedonia, Mali i Zi, si është pranua Shqipëria, pra janë pranuar kryesisht për interesa strategjike, gjeopolitike, të sigurisë dhe të ndikimit perëndimor në këtë rajon. Dhe unë e shoh ma të lehtin prej anëtarësimeve në BE, OKB dhe NATO, më të lehtin e shoh në NATO dhe unë e shoh edhe hapin e parë që është më i rëndësishmi për sigurinë e Kosovës”, ka thënë Bajrami në ResPublika në Tëvë 1.
Bajrami ka shtuar se Bashkësia Ndërkombëtare po tenton ta afrojë Serbinë karshi qëllimeve të veta dhe për këtë ka harruar edhe të kaluarën gjenocidale të saj.
“Konteksti politik ka ndërruar. Tani Bashkësia Ndërkombëtare shumë po tenton që ta afrojë Serbinë karshi qëllimeve të veta, ka filluar në një mënyrë të harrojë të kaluarën gjenocidale të Serbisë dhe po tenton që presidentin Vuçiq por edhe komplet klasën politike ta inkuraojë për një zgjidhje kreative dhe ta afrojë në procesin e integrimeve evropiane”, ka deklaruar Bajrami.
Sipas tij Kosova është e çakorduar me Bashkësinë Ndërkombëtare dhe për këtë edhe është qortuar.
“Kosova është pak e hutuar në këtë proces, është pak e çakorduar me partnerët ndërkombëtarë, nuk i kemi vijat e njëjta a nuk jemi në valë plotësisht të njëtë me ShBA-në,. Po mungon koordinimi,. Sepse ShBA janë një nga krijuesit kryesorë të këtij shteti dhe çfarëdo dobësimi i këtij shteti, defunksionalizimi, është një humbje e madhe apo dobësim i vet pozicionit të ShBA-së sepse ata kanë investu për një shtet funksional”, ka shtuar ai.
“Praktikisht që disa herë ShBA-të dërgojnë një lloj qortimi ndaj Kosovës që nuk është proactive apo tentimi që përmes faktorëve tjerë të bisedohet që për mendimin tim nuk është orientim i drejtë, sepse faktori relevant për zgjidhjen e kësaj çështje është Qeveria, edhe pse OJQ-të mund të ndihmojnë”, ka shtuar ai.
Profesor Bajrami vlerëson se deri ën fund të marsit palët duhet të japin përgjigjen përfundimtare, nëse e pranojnë apo jo planin franko-gjerman.
“Mendoj se ky muaj është vendimtar sepse si duket ka një afat e ai afat si duket është fund i marsit. Palët definitivisht duhet me e dhënë përgjigjen finale, pro ose kundër planit franko-gjerman”, ka deklaruar ai.
