Avokati Ardian Bajraktari ka vlerësuar se çështja e Gjykatës Speciale dhe procesi që po zhvillohet në Hagë duhet të trajtohen si çështje mbi partiake, duke theksuar rëndësinë e reflektimit politik për pasojat që ky proces ka për vendin. Ai ka folur për këtë temë në emisionin “Ditari” në Tëvë1, ku është diskutuar edhe për mospropozimin e ndryshimeve të amendamenteve përkatëse nga presidentja.
Bajraktari ka vlerësuar se veprimet e fundit politike, përfshirë miratimin e një deklarate më 16 shtator, themelimin e grupit ndërinstitucional dhe miratimin e ligjit, janë tregues të një reflektimi të skenës politike për çështjen e Hagës.
Sipas tij, ndonëse këto hapa janë ndërmarrë me vonesë, ato paraqesin një zhvillim pozitiv në raport me përgjegjësitë që institucionet dhe subjektet politike kanë ndaj qytetarëve.
“Çështja e Hagës dhe procesi atje, jo vetëm që do të duhej që në krye të herës të trajtohej si element mbi partiak, por edhe këto veprimet e fundit, me theks të veçantë miratimi i deklaratës pas 16 shtatorit, pastaj edhe themelimi i grupit ndërinstitucional dhe miratimi i ligjit, ishin disa indikatorë se, ndonëse vonë, mirëpo megjithatë më mirë vonë sesa kurrë, kemi një këndellje të skenës politike në reflektimin e drejtimit mbi përgjegjësitë që kanë ndaj popullit”, ka deklaruar Bajraktari.
Avokati ka theksuar se procesi në Hagë ka pasoja jo vetëm për të kaluarën dhe të tashmen, por edhe për të ardhmen e Kosovës. Për këtë arsye, sipas tij, është e rëndësishme që subjektet politike të reflektojnë dhe të gjejnë mbështetje të përbashkët për çështjet që lidhen me këtë proces.
Duke folur për mundësinë e ndryshimeve kushtetuese dhe rolin e Kuvendit, Bajraktari ka theksuar se asnjë iniciativë nuk mund të kalojë pa mbështetjen e shumicës parlamentare.
“Duke parë pasojat që ka ky proces në Hagë, si në të kaluarën, në të tashmen, por edhe për të ardhmen e vendit, vlerësoj se, mbi këto premisa, duhet të kemi edhe reflektim të subjekteve politike, sepse as kjo nismë e asnjë tjetër nuk mund të kalojë në Kuvend pa pasur mbështetjen e shumicës”, ka thënë ai.
Bajraktari është ndalur edhe te deklarimet e kryeparlamentares Albulena Haxhiu, duke vlerësuar se diskutimi për këtë çështje në Kuvend nuk është paraqitur me karakter kufizues, por si mundësi për reflektim dhe gjetjen e mbështetjes politike.
