Deputeti i zgjedhur i Lëvizjes Vetëvendosje, Agim Bahtiri, deklaron se partia e tij po e bënë të pamundurën që vendin mos ta dërgojë edhe një herë në zgjedhje.
“Nuk jemi interesuar që t’i marrim paratë nga magjet e fukarnjeve dhe ata t’i dërgojmë për organizimin e zgjedhjeve. Jemi duke e bërë maksimumin që vendin mos ta dërgojmë në zgjedhje”, ka thënë Agim Bahtiri në emisionin “Këndi i Debatit” më Tëvë1.
Bahtiri insiston që duhet bërë një qeveri së bashku me Lidhjen Demokratike të Kosovës.
“Synimi jonë është që mos të qeverisim vetëm. Ne duam ta zgjerojmë hapësirën që të qeverisim së bashku. Shpresoj se do të arrihet një marrëveshje”, theksoi Agim Bahtiri.
Ish-kryetari i Mitrovicës së Jugut, kujton se Kosova herën e fundit ka shkuar në zgjedhje vetëm për faktin se nuk ishte arritur marrëveshje për presidentin.
“Kosova herën e kaluar ka shkuar në zgjedhje vetëm për president. Herën e kaluar kemi shkuar në 12 –të të natës te familja Jashari për ta zgjedhur president Murat Jasharin”, pohoi Agim Bahtiri.
