Avokati, Kadri Osaj, e cilëson shkelje bastisjen e shtëpisë së ish-komandantit të përgjithshëm, Sylejman Selimi.
Osaj thotë se bastisja është shkelje procedurale për faktin se subjekt i ndjekjes penale nuk ishte vetë Selimi.
“Në rastin konkret është bërë një shkelje për faktin se subjekt i ndjekjes penale duhet të jetë individi dhe jo vendi ku ata pretendojnë se ka diçka që kishte me qenë e rëndësishme për zhvillimin e hetimeve të kësaj çështjeje penale”, tha ai në emisionin “Ditari” në Tëvë1.
Ndërkohë, për provat që janë marrë në shtëpinë e Selimit, avokati thotë se ato që merren kundërligjshëm s’mund të përdoren si prova në seancat e shqyrtimit kryesor.
Ndërkaq, takimin e ish-ministrit të Drejtësisë, Hajredin Kuçi me zyrtarë të Gjykatës Speciale, Osaj e konsideron absurde. Sipas tij, në qoftë se një anëtar i stafit mbrojtës thirret nga zyrtarë të EULEX-it konsiderohet ndërhyrje.
“Në qoftë se një zyrtar i EULEX-it e thirr një anëtar të stafit mbrojtës, konsideroj që është një ndërhyrje për faktin se avokatura është e pavarur, është një institucion i pavarur dhe i garantuar me kushtetutë. Biseda me Hajredin Kuçin për mua është absurde dhe e panevojshme. Megjithatë, Kuçi nuk është dashur që ta realizojë një bisedë me ta, sepse në qoftë se ai është pajtuar pa i prezantuar atij që kanë të drejtë me bë atë, atëherë kanë bërë një shkelje procedurale, e paprecedent, pra nuk është dashur në atë mënyrë me veprua”, shtoi ai.
