Avokati Urim Vokshi, i cili përfaqëson njërin nga pesë policët e arrestuar në lidhje me vdekjen e 27-vjeçarit, ka dhënë detaje rreth ngjarjes në emisionin “Këndi i Debatit” në Tevë1.
Vokshi ka ngritur shqetësime për mënyrën se si është duke u paraqitur rasti në publik, duke theksuar se shumë rrethana nuk janë bërë të ditura, ndërsa videot e publikuara nuk përfshijnë gjithë ngjarjen.
“Është e dhimbshme dhe e dëmshme për procesin që vetëm pjesë të shkëputura nga pamjet filmike janë publikuar. Ato nuk e japin gjithë tablonë e ngjarjes,” ka thënë ai.
Avokati paraqiti edhe versionin e njërit prej zyrtarëve policorë të përfshirë në rast.
“Policët janë thirrur për të reaguar ndaj ankesave të shumta të qytetarëve. Viktima, sipas tyre, ka tentuar të sulmojë një zyrtar policor përmes dritares së veturës dhe është larguar. Më pas ka bërë sërish përpjekje për sulm, por asnjëri nga policët nuk ka përdorur armë, pendrek apo forcë të tepruar,” tha Vokshi.
Ai shtoi se sipas deklarimeve, 27-vjeçari ka shfaqur sjellje të çuditshme, përfshirë halucinacione dhe frikë se po vritej nga policia, gjë që, sipas tij, mund të jetë indikator i një gjendjeje të rënduar psikike apo ndikimi nga substanca.
“Zyrtarët kanë ndërhyrë me duar të zbrazëta gjatë prangosjes. Nuk ka pasur dhunë joproporcionale, dhe menjëherë pas prangosjes, viktima është liruar. E gjithë ndërhyrja ka pasur për qëllim vetëm neutralizimin e situatës,” u shpreh Vokshi.
Avokati kritikoi faktin që publikut po i serviren vetëm segmente të pamjeve, duke kërkuar transparencë të plotë për të gjitha rrethanat.
“Pamjet që janë publikuar nuk e përfaqësojnë të gjithë skenën. Kjo është shqetësuese sepse ndikon në perceptimin publik pa u analizuar të gjitha faktet,” theksoi ai.
Në fund, Vokshi konfirmoi se klienti i tij nuk është kundër hetimeve dhe se është i gatshëm të bashkëpunojë me autoritetet për zbardhjen e rastit.
Pesë policë janë aktualisht në ndalim, ndërsa Prokuroria ka iniciuar hetime për veprën penale “vrasje nga pakujdesia”. Seanca për shqyrtimin e kërkesës për paraburgim është caktuar për 9 korrik.
