Në ora 9 e mëngjesit dhjetëra autobus të linjave publike dhe private u stacionuan para Komunës së Prishtinës.
Madje ata bllokuan edhe disa rrugë në kryeqytet.
Punëtorët e autobusëve kishin vetëm një kërkesë, shlyerjen e borxheve që komuna i ka këtyre, në mënyrë që të rifllojnë punën.
Në shenjë pakënaqësie për dy orë radhazi, qëndruan këtu.
“Ministria ka alokuar ditën e premte 3.2 milionë, komuna i ka alokuar për Trafikun Urban 680 mijë euro, nuk janë pjesë e asaj që mbulojnë shpenzimet e naftës që kemi borxh 1 milion, i kemi 800 mijë euro borxh punëtorëve për dy rroga, 100 mijë euro po na shkëputet kontrata për sigurime shëndetësore se kemi borxh. Komuna nuk po reflekton, na detyron neve kinse ministria nuk i ka alokuar paratë”, ka thënë Gashi.
Operatorët privat, thonë që këto mjete nuk po mjaftojnë as për ta.
“Autobusët nuk dalin në qarkullim pa u kryer pagesat, nuk kemi mundësi, është alokuar një shumë e vogël simbolike që nuk i plotëson kërkesat tona dhe nuk kemi mundësi me i kry obligimet ndaj furnitorëve tonë që me vazhduar shërbimin ndaj qytetarëve, ju kërkoj ndjesë qytetarëve dhe i falënderojë për durimin që e kanë”, është shprehur përfaqësuesi i shoqatës.
E se protesta do të vazhdojë deri në shlyerjen e borxheve që ka Komuna ndaj këtyre ndërmarrjeve tregoi Ismet Haliti, sekretar i sindikatës në sektorin privat.
“Forma e organizimit nesër do të ndërrojë, po merr karakter politik kjo protestë e jona, që zero politikë ka në këtë protestë. Kështu që nga nesër do të mbajmë protestën mes Qeverisë dhe Komunës, punën do vazhdojmë kur të dalin mjetet për pesë muaj”, ka theksuar Haliti.
Për disa muaj radhazi nuk përfituan pagesë nga Komuna as linja “24 Yjet”.
“Ne i kërkojmë ato që kemi punuar, kemi dhënë djersë dhe jemi ata që mbajmë familje. Sikur gjithë të tjerët që marrin paga edhe ne i kërkojmë ato për të mbijetuar”, është shprehur përfaqësues i “24 yjet”.
Përfaqësuesit sindikalistë kërkuan llogari nga i pari i Komunës, ku ky i fundit edhe sot i priti në takim.
E nga takimi, dolën pa zgjidhje. ani pse Përparim Rama tha se është i gatshëm për takim me ministrin e financave në çdo kohë për të gjetur zgjidhje.
“Qiti paret minstër, qiti paret menjëherë”, ka thënë Rama.
Rama, gjatë ditës mbajti edhe një konferencë për media, në të cilën tregoi se kanë thirrur seancë të jashtëzakonshme.
“Ne kemi thirr edhe seancë të jashtëzakonshëm për të enjten, me mandatarët ekzistues të votojmë edhe për bartjen e cila ka qenë e bllokuar edhe aj, po tash besoj e kemi një mendësi të ndryshuar për me votu barjten që janë edhe 28 milion tjera shtesë i kemi 35 milionë të bllokuara tash e sa muaj tash, të enjten do ta fusim në seancë edhe 28 milionë të tjera, i thërras të gjithë asamblist që të votojmë edhe 28 milion që kryeqyteti të ketë opsione”, ka përfunduar Rama.
E kryesindikalisti i trafikut urban, thotë që kanë marrë një premtim që kjo pikë e rendit të ditës do të votohet të enjten.
Protesta e punënonjsëve të autobusëve do të vazhdoj edhe të mërkurën.
