Pas skuadrave nga Premier League, interesim për shërbimet e mbrojtësit të krahut të majtë, Mario Mitaj ka shprehur edhe Atletico Madridi.
“Fichajes” ka raportuar të hënën se Atletico është futur në garë për futbollistin e Kombëtares së Shqipërisë, të cilin po synon ta transferojë gjatë këtij muaji.
Trajneri i Atleticos, Diego Simeone ka kërkuar përforcime në krahun e majtë, dhe Mitaj po shihet si opsioni më i mirë i mundshëm, duke pasur parasysh moshën dhe çmimin në treg.
22-vjeçari, aktualisht është pjesë e ekipit nga Arabia Saudite, Al-Ittihad, i cili më herët ka konfirmuar se për Mitajn ka interesim nga Anglia dhe Spanja.
Thuhet se Atletico është gati të ofrojë deri në 10 milionë euro për ta fituar garën për Mitajn, i cili kërkohet edhe nga Burnley e disa ekipe tjera angleze.
Mitaj para një viti iu bashkua Al-Ittihadit nga Lokomotiva e Moskës për 4.5 milionë euro dhe me ekipin saudit ka kontratë deri në verën e vitit 2028.
Me Al-Ittihadin, Mitaj ka fituar titullin e kampionit dhe Kupën e Arabisë Saudite, ndërsa këtë sezon ka shënuar 1 gol dhe ka bërë 2 aistime në 17 paraqitje.
