Arsenali ka shënuar fitore bindëse të shtunën mbrëma në kuadër të xhiros së dytë të Premier Leagues. “Topçinjtë” në shtëpi e mposhtën Leeds Unitedin me rezultatin e thellë 5:0.
Dy gola u realizuan në pjesën e parë kurse dy të tjerë në pjesën e dytë.
Mbrojtësi i krahut, Jurrien Timber, e shënoi golin e parë në minutën e 34-t.
Në minutën e parë shtesë të pjesës së parë, Bukayo Saka, e dyfishoi rezultatin.
Realizatori i golit të tretë ishte qendërsulmuesi Viktor Gyokeres në minutën e 48-të.
Tetë minuta më pas, Timber, shënoi sërish për 4:0.
Golin e fundit e shënoi suedezi Gyokeres nga penalltia në minutën e 95-të.
Arsenali pak para fillimit të ndeshjes e prezantoi transferimin më të ri anglezin Eberechi Eze.
Eze tek Arsenali u transferua nga Crystal Palace për 60 milionë funte.
Te klubi që për trajner e ka Mikel Artetan ndaj Leedsit debutoi 15-vjeçari Max Dowman. Ai u bë futbollisti i dytë më i ri që ka luajtur në historinë e Premier Leagues me 15 vjet e 235 ditë.
