Policia e Kosovës ka njoftuar se ka ndaluar një person nën dyshimin për keqpërdorim të pozitës zyrtare dhe falsifikim të dokumenteve, pas dyshimeve për manipulime me kërkesat për shfrytëzim të parcelave pyjore në rajonin e Prizrenit.
Sipas komunikatës zyrtare, dyshimet janë ngritur pasi një grup prej 39 personash kanë paraqitur kërkesat për marrjen e parcelave në shfrytëzim nga Agjencia Pyjore e Kosovës (APK), por hetimet kanë zbuluar se këto kërkesa nuk janë përpiluar dhe as nuk janë nënshkruar nga personat emrat e të cilëve figurojnë aty.
Hetimet e njësive kompetente policore kanë siguruar dëshmi se i dyshuari, mashkull kosovar, duke shfrytëzuar detyrën ose autoritetin zyrtar, ka tejkaluar kompetencat e tij me qëllim përfitimi personal. Ai dyshohet se ka marrë para nga qytetarë të ndryshëm dhe u ka premtuar rregullimin e dokumentacionit të nevojshëm për të përfituar prona me qira nga APK.
I dyshuari është intervistuar në prani të avokatit mbrojtës, ndërsa me vendim të prokurorit është ndaluar për 48 orë. Ndaj tij rëndojnë dy vepra penale: “Keqpërdorim i pozitës apo autoritetit zyrtar” dhe “Falsifikim i dokumenteve”.
