Një person është arrestuar gjatë ditës së djeshme, pasi dyshohet se ka shtënë me armë zjarri gjatë një ahengu në Shtime.
Sipas Policisë së Kosovës, i dyshuari ka pranuar se kishte shtënë me armë dy deri në tri herë.
“Njësitet policore kanë dalë në vendngjarje, ku kanë kontaktuar pronarin e ahengut. Sipas informacioneve të siguruara, në vendin e ngjarjes, i dyshuari kishte shtënë me armë zjarri, i cili e ka dorëzuar armën me gaz dhe gjatë intervistimit ka pranuar se kishte shtënë 2–3 herë”, thuhet në njoftimin e policisë.
Tutje, policia ka bërë të ditur se arma është konfiskuar, ndërsa me vendim të prokurorit janë iniciuar rastet për veprat penale “përdorim i armës apo mjetit të rrezikshëm” dhe “mbajtje në pronësi, posedim i paautorizuar i armës”.
I dyshuari, siç ka bërë të ditur policia, është liruar dhe rasti do të hetohet në procedurë të rregullt.
