Një person u arrestua të enjten në zonën e Göteborgut në Suedi, me dyshimin për një vepër penale veçanërisht të rëndë që lidhet me drogën dhe për pastrim parash.
Sipas njoftimit zyrtar, arrestimi është pjesë e një operacioni të përbashkët kundër krimit të organizuar (Operacioni OB).
Paralelisht me arrestimin, u kryen bastisje edhe në Kosovë, ku autoritetet sekuestruan prona, para të gatshme dhe një automjet.
Në Suedi, u siguruan sende me vlerë dhe prova dixhitale që mundësojnë hetime të mëtejshme mbi flukset financiare të dyshuara.
Operacioni u zhvillua në bashkëpunim të ngushtë me Zyrën e Prokurorisë Speciale të Kosovës.
Prokurori i Shtetit Daniel Larson theksoi se legjislacioni i ri është përdorur për të aksesuar asetet jashtë vendit dhe bashkëpunimi me autoritetet kosovare ka qenë thelbësor për suksesin e operacionit.
Shefi i Policisë në Rajonin Perëndimor, Tomas Stakeberg Jansson, deklaroi: “Krimi nuk duhet të japë leverdi, dhe nuk ka rëndësi nëse përpiqesh të fshehësh të ardhurat e krimit jashtë vendit. Ne do t’i gjejmë ato dhe do t’i konfiskojmë.”
Hetimet paraprake po kryhen nga prokurorët Daniel Larson dhe Håkan Larsson, në kuadër të Autoritetit Suedez të Krimit Ekonomik dhe Njësisë Kombëtare kundër Krimit Ndërkombëtar dhe të Organizuar (RIO).
Operacioni është rezultat i një hetimi të gjatë ndërkombëtar për të luftuar krimin e organizuar dhe për të konfiskuar të ardhurat e paligjshme.
