Ministria e Punëve të Brendshme të Maqedonisë së Veriut njoftoi se një person është arrestuar dhe disa të tjerë janë intervistuar lidhur me thirrjet anti-shqiptare të bëra gjatë ndeshjes së basketbollit mes Maqedonisë së Veriut dhe Rumanisë, që u zhvillua më 2 gusht në Pallatin e Sporteve në Kumanovë.
Gjatë ndeshjes, tifozët vendas brohoritën parulla me përmbajtje ofenduese dhe nacionaliste, si: “Maqedoni e pastër”, “Shqiptari i mirë është shqiptari i vdekur” dhe “Dhoma e gazit për shqiptarët”. Këto thirrje u dëgjuan edhe në praninë e krerëve të lartë të shtetit, përfshirë kryeministrin Hristijan Mickoski, kryetarin e Kumanovës Maksim Dimitrievski, ministrin e Jashtëm Panço Toshkovski dhe zëvendëskryeministrin Ivan Stoilkoviq.
Sipas njoftimit të Ministrisë së Brendshme, i arrestuari S.M., 30 vjeç nga Kumanova, dyshohet se është përpjekur të sjellë një pano me përmbajtje fyese gjatë pushimit mes pjesëlojësve të ndeshjes.
“Lidhur me ndeshjen e basketbollit që u zhvillua më 02.08.2025 në Pallatin e Sporteve në Kumanovë, disa të dyshuar tashmë janë thirrur në Departamentin e Policisë së Kumanovës dhe është kryer një intervistë zyrtare. Pas analizave të kryera në koordinim me Prokurorinë Publike të Kumanovës, do të merren masa specifike ligjore kundër personave të përfshirë, përfshirë edhe ndjekje penale,” thuhet në njoftim.
Ministria e Brendshme theksoi se policia do të jetë jashtëzakonisht rigoroze ndaj çdo shkeljeje të rendit dhe qetësisë publike, veçanërisht ndaj thirrjeve ofenduese bazuar në përkatësi kombëtare, etnike ose fetare.
“Kjo do të sanksionohet në mënyrën më të ashpër, pa asnjë tolerancë. Vetëm brohoritjet dhe mbështetja sportive të ndershme mund të na sjellin sukses, fitore dhe gëzim sportiv,” deklaroi Ministria.
Nga ana tjetër, udhëheqësit e tifo-grupit “Kumani” kanë mohuar përfshirjen e tyre dhe fajësinë për këto thirrje, ndërsa disa pjesëtarë të grupit janë intervistuar nga policia, raporton “Alsat M”.
