Policia e Kosovës ka njoftuar se një shtetas kosovar është arrestuar në orët e para të mëngjesit të sotëm, pasi ishte shpallur në kërkim ndërkombëtar nga autoritetet e Belgjikës.
Sipas njoftimit të Policisë, arrestimi i personit me inicialet S.U. është kryer rreth orës 00:55, në Pikën e Kalimit Kufitar në Kullë, nga zyrtarët e Drejtorisë për Bashkëpunim Ndërkombëtar Policor, në bashkëpunim me njësitë tjera policore.
Policia bëri të ditur se ndaj të dyshuarit ishte lëshuar urdhërarrest ndërkombëtar përmes INTERPOL-it nga autoritetet belge.
“Zyrtarët policorë nga Drejtoria për Bashkëpunim Ndërkombëtar Policor, në bashkëpunim dhe koordinim me njësitet tjera të policisë, në Pikën e Kalimit Kufitar në Kullë, kanë bërë arrestimin e shtetasit kosovar S.U., pasi i njëjti kërkohej përmes INTERPOL-it me urdhër arrest ndërkombëtar të lëshuar nga autoritetet e Belgjikës”, thuhet në njoftimin e Policisë së Kosovës.
Pas arrestimit, me urdhër të prokurorit, personi është dërguar në mbajtje për 48 orë.
