Nga pasditja e së mërkurës, e sërish edhe paraditën e së enjtes, orientimin e kishte kah Policia e Kosovës.
Gazetarja, Lindita Berisha, pas dhënies së deklaratës për sulmin që iu bë nga një grua gjatë orarit të punës në Rrugën C në kryqytet, ende kishte procedura për t’u kryer përpara organeve të rendit.
Atë e kishte shqetësuar edhe një telefonatë e sulmueses në redaksinë e medias lajmi.net, ku punon.
“Personi që na ka sulmu, çohet në mëngjes herët, edhe thirr në numrin në redaksi edhe kërkon që pamjet me u largu. Kjo ka qenë prapë shqetësuese për mua, se e di që ai person është i lirë, edhe vazhdimisht ndihna e kërcënume, se për shembull unë mundem me dal edhe ai person me më sulmu prapë”, ka thënë gazetarja Lindita Berisha.
Mirëpo, organet e rendit janë vënë në lëvizje.
Prokuroria ka njoftuar se gruaja, M.B, është dërguar në mbajtje prej 48 orësh.
“Pas ndërmarrjes së veprimeve hetimore dhe grumbullimit të provave shtesë, si dhe riintervistimit të njërit nga të dyshuarit, Prokurori i Shtetit ka lëshuar aktvendim mbi ndalimin e M.B., e dyshuar për shkak të veprave penale “Kanosja” dhe “Lëndimi i lehtë trupor”, sipas KPRK-së. E njëjta është dërguar në mbajtje në kohëzgjatje prej 48 orësh, derisa është intervistuar edhe një person i dyshuar i përfshirë në këtë rast. Po ashtu, në këtë çështje penale janë marrë deklaratat e palëve të dëmtuar dhe në koordinim me policinë janë duke u ndërmarrë veprime të tjera hetimore”, thuhet në vendim të Prokurorisë Themelore në Prishtinë.
Gazetarja Berisha shpjegon se sulmi ndaj saj dhe koleges tjetër, Fjolla Hyeseni ka vazhduar për gati një orë, e që gjithçka lidhej me pamjet që ato i kishin sulmueses dhe një personi tjetër, duke sulmuar taksistin me të cilin gazetaret kishin shkuar për të përcjellur një ngjarje.
“Ne jemi mundu qysh e keni pa edhe në video me i ikë sulmit, por ajo ka vazhdu. Na ka mbajt peng çka është më e keqja. Nuk na la me u largu, faktikisht na ka sulmu vazhdimisht, dhe ideja e saj ishte të na merrte telefonat dhe t’i fshinte videot ku ajo shihet duke sulmuar taksistin”, ka treguar Berisha.
Të shqetësuar me gjuhën e përdorur nga sulmuesja janë edhe Asociacioni i Gazetarëve të Kosovës.
“E konsideron si rrezik të lartë për sigurinë fizike të gazetarëve derisa janë duke e bërë punën e tyre. Një shqetësim tjetër që jemi përballur pasi e kemi parë videon është gjuha ofenduese, fyese, denigruese dhe seksiste që bëhet vazhdimsht ndaj dy gazetareve në fjalë nga personat e dyshuar në këtë rast”, tha anëtarja e Bordit, Florandë Morina.
Ky rast i sulmit të gazetarëve ka ngjallur reagime të shumta.
