Një zyrtar policor nga stafi civil është arrestuar nga Inspektorati Policor i Kosovës, pasi që i njëjti dyshohet se është përfshirë në një rrahje në një lokal, që ka ndodhur mbrëmë në rrugën “Ganimete Tërbeshi”, në Gjakovë.
Zyrtari policor është arrestuar bashkë edhe me një person, nën dyshimin se kanë kryer veprën penale “Lëndim i lehtë trupor”.
Në njoftimin për media është bërë e ditur se me vendim të prokurorit të njëjtëve u është caktuar masa e ndalimit për 48 orë, kurse si pjesë e procedurës administrative pjesëtari i policisë nga stafi civil është suspenduar, shkruan teve1.info
“IPK është njoftuar për këtë rast bazuar në autorizimet ligjore të saj pasi që informacionet ishin se ne këtë rast ishte i përfshirë si i dyshuar edhe një pjesëtar i policisë (zyrtar i stafit civil pa autorizime policore dhe jashtë detyrës zyrtare). Hetuesit e IPK-së kanë dalë në vendin e ngjarjes dhe kanë ndërmarrë disa veprime fillestare hetimore duke përfshirë edhe analizimin e disa video pamjeve të incizuara nga kamerat e sigurisë së një lokali”, thuhet në njoftimin e IPK-së.
Lidhur me këtë rast, tutje është thënë se veprime të tjera do të ndërmerren në përputhje me autorizimet ligjore të IPK-së dhe në koordinim me prokurorinë kompetente. /teve1.info/
