Tre persona janë arrestuar pasi që të njëjtit kanë kryer vjedhje të rëndë në terminalin doganor në Han të Elezit.
Sipas njoftimit të policisë të dyshuarit kanë vjedhur pjesë metalike me përmbajtje bakri.
Policia ka bërë të ditur se të arrestuarit janë të moshës 42 vjeç, 27 vjeç dhe 38 vjeç.
“Më datë 25.11.2024, rreth orës 23:30, policia e stacionit në Han të Elezit ka pranuar një informatë për një rast vjedhjeje të rëndë në terminalin doganor në këtë zonë. Pas mbërritjes në vendngjarje, hetuesit policorë, nën autorizim të Prokurorit të Shtetit, kryen ekzaminimet e nevojshme. Hetimet fillestare zbuluan se persona të panjohur, me qëllim përfitimi pasuror të kundërligjshëm, kishin depërtuar me forcë në njërin nga objektet e terminalit doganor, duke vjedhur pjesë metalike me përmbajtje bakri. Pas një pune intensive hetimore, sot, më datë 09.01.2025, policia ka arritur të identifikojë dhe të arrestojë tre persona të dyshuar për këtë vepër penale. Pas intervistimit, me vendim të Prokurorit të Shtetit, ata janë ndaluar për 48 orë. Personat e arrestuar: A.R. (M/K), 42 vjeç, R.R. (M/K), 27 vjeç, I.L. (M/K), 38 vjeç”, thuhet në njoftimin e policisë.
