Amerikani me pasaportë të Kosovës, Malcolm Armstead është shpallur basketbollisti më i mirë për xhiron e dytë në Superligën e Kosovës.
FBK, ka bërë të ditur se Armstead është shpallur “MVP i Javës” pasi udhëhoqi Sigal Prishtinën drejt fitores ndaj Vëllaznimit, duke përfunduar ndeshjen me 26 pikë, 4 kërcime e 3 asistime.
Me indeksin e lojës 29, Armstead është përfshirë edhe në Top-5, ku janë të përfshirë edhe Trevor Moore, Xavier Jonhson, Arian Azemi e Jericole Hellems.
Amerikanët Moore e Johnson kanë udhëhequr Pejën drejt triumfit ndaj Trepçës, duke u mbyllur ndeshjen me indeksin e lojës 25, përkatësisht 21.
Moore ka regjistruar 21 pikë, 5 kërcime e 2 asistime kurse Johnson ka kontribuar me 12 pikë, 13 kërcime e 1 asistim për fitoren e Pejës.
Azemi ishte më efikasi te Bashkimi, duke realizuar 11 pikë, 4 kërcime e 6 asistime në fitoren kundër Rahovecit 029, ndërsa Hellems me 19 pikë, 10 kërcime e 3 asistime udhëhoqi Borën në triumfin ndaj Golden Eagle Yllit.
