Në një lidhje direkte për emisionin “Info Nata” në Tëvë 1, Arifi tha se prej 13 hapave, Kosova i ka realizuar deri më tani vetëm katër.
“Ndoshta do të ketë një deklaratë pozitive që ato do të ndodhin shumë shpejt, por nga aspekti procedural është e komplikuar, nesër nuk mund të mirret asnjë vendim. Se nuk e di se si është përcjellur te publiku kosovar kjo që do të mirret vendimi nesër. Është e pamundur teknikisht. Prej 13 hapave, vetëm katër deri tash janë realizu”, tha ai.
Tutje, Arifi tha se beson që brenda këtij viti, kosovarët do mund të lëvizin lirshëm pa viza.
“Po besoj që brenda këtij viti, apo brenda fundvitit të këtij viti, mund të arrihet deri te ato procedura që i ceka dhe në fillim të vitit të ardhshëm apo të paktën maksimumi mund të jetë në pjesën e dytë të vitit të ardhshëm mund të lëvizim pa viza, nëse jo më herët”, tha Arifi.
Më 23 dhe 24 qershor është paraparë që të zhvillohet samiti BE – Ballkani Perëndimor. Por lidhur me këtë, kancelari gjerman Olaf Scholz ka thënë sot se nuk është i sigurt nëse do të zhvillohet ky samit.
Ndonëse ishte paralajmëruar që në këtë samit do të diskutohet edhe çështja e liberalizimit të vizave për Kosovën, kjo nuk është përfshirë në agjendën e publikuar dje nga Këshilli Evropian. /Teve1.info/
